John 21
Lavanga Sangsangu Mumu Laxanmat
1Melemu ne Iesu ga ru asuvos ti luvuttadi loklok ka anasa ren to saparap lavatdan kis, Tiberias. Ga ravasu xeretna. 2At lara laaleng ne Simon Pita, la ne Tomas, laasen bok teren ne Didimas, la ne Natanael boro Kena at lenep silok Galili, la lumdak at ne Sebedi, la lara laradi loklok ka anasa bok digak lox eburu. 3La ne Pita ga lok tidi, “Nenia anat pas kusu ri sep mat.” La diga lok tin, “Nema bok mana emu minu.” La nedi axap diga vas kaxat la diga los kas at lesepang la digatla xat. Ketla ap mo laxanimin di goxo sep ka tepenmat.4Maxantamak suubu ne Iesu ga ru ro loxon, ketla luvuttadi loklok ka anasa di goxo ven kibis i.
5Neni ga toro ridi xeretna, “Laxamdak. Kereva, mi sep ka tevenmat?”
La diga vorang i rin keretna, “Kopmen.”
6La ni ga lok tidi xeretna, “Mina lu mi laxatkat atnimi ro at lenep tino at lesepang la mina sep ka tevenmat.” Diga lox i xuren la di goxo epovo na sat amlong laxatkat mila ga umsu mi laxanmat solo. 7La mo laradi loklok ka anasa ne Iesu ga vavara aleng i, ga lok ti ne Pita, “Leeme Silok mo.” Pita ga ronga i nom la soso mun ni ga etara lavanga singsiga ren, no ni ga lok kepe i, la ga los si uto at ladan la ga xobok uto loxon. 8Luvuttadi loklok ka anasa diga mumu mi lesepang, diga sasat laxatkat ga umsu mi laxanmat, mila digak lox auret mun loloxon. 9Se diga oso, diga ven laxao mi levenmat gak lok teren la diga ven bok lengkongkide ga nemen saparap laxao. 10La ne Iesu ga lok tidi, “Mina lok ka tevenmat at nom ude.”
11La ne Simon Pita ga los kas at lesepang la ga oso mi laxatkat, ga umsu mi laxanmat silok ga epovo at legesa sangaun kobot mi lavalimo sangaun mi lavantun (153). Laxanmat solo ketla laxatkat kopmen goxo rem das. 12La ne Iesu ga lok tidi, “Ude nimi la mina anan be.” Kopmen tara atdi luvuttadi loklok ka anasa gita sue i do neni nege mila digaklen i do neni Leeme Silok. 13La ne Iesu gat pas la ga lok kaka lengkongkide la ga raba di min la ga raba bok di mi levenmat. 14Na lovotpot sev avantun at ne Iesu saparap luvuttadi loklok ka anasa ren melemu at laxakatu kaxat amlong teren at lanmet.
Iesu Ga Epaase Mi Ne Pita
15Se diga an axap pam, Iesu ga sue ne Simon Pita, “Simon, lamdak at ne Jon. Kereva, labalamu ram tia i silok aleng ti labalamu ram ti na luvuttadi?”Ni ga vorang i rin keretna, “Laaba, Leeme Silok. Uklen i do a balamu u.”
La ne Iesu ga lok tin, “Una raba luxa laxannat sipsip tarak.”
16La ne Iesu ga sue manga i, “Simon, lamdak at ne Jon. Kereva, u balamu ruturun ia?”
La ni ga vorang i, “Laaba, Leeme Silok. Uklen i do a balamu u.”
La ne Iesu ga lok tin, “Una lok tatao levesipsip tarak.”
17La ne Iesu ga sue sev avantun box i xeretna, “Simon, lamdak at ne Jon. Kereva, u balamu ia?”
La ne Pita ga lok tuntun mila ne Iesu ga sue sev avantun box i, ‘Kereva, u balamu ia?’. La ni ga lok ti ne Iesu, “Leeme Silok, ukleklen lempanga axap, uklen i do nia a balamu u.”
La ne Iesu ga lok tin, “Una raba luxa levesipsip tarak. 18A tong tuturun i. Ga se nenu laau maxat mene, uga siga lempanga singsiga ram la ugat pas mu lavavara ram. Ketla do una sioxo, ubang song asu mi lukngam la tara vetpes nabak paxasiga u la dibam lam ka u uto at lengkot u noxopara unat pas uve.” 19Iesu ga tong i na xusu na lox ase ne Pita mi lanmet salai ni ba met teren kusu na lox aurut laasen at ne Moroa. La ni ga lok ti ne Pita, “Una mumu asu ia.”
20Pita ga rem gili la ga ven i do mo laradi loklok ka anasa ne Iesu ga vavara aleng i, ga mumu asu du. Neni mo lara ga sep sogo at lobongobong at ne Iesu at laanan kaala la ga lok tin, “Leeme Silok, nege ba song araba u ri limixin kapmek?” 21Pita ga ven i la ga sue ne Iesu, “Leeme Silok, lempanga salai mo ba vot saparap na laradi?”
22Iesu ga vorang i rin keretna, “Do nenia a vara i do neni na rooro se at lomlong tarak, nemen uta doma solo i nom. Nenu una mumu asu ia.” 23Luvuttadi loklok ka anasa diga ronga na levelinga la diga tong i ri lavanga do mo laradi loklok ka anasa noxo met. Ketla ne Iesu goxo tong i xuren, neni ga lok mun keretna, “Do nenia a vara i do neni na rooro se at lomlong tarak, nemen uta doma solo i nom.”
24Mo laradi loklok ka anasa ga ven na lempanga la ga malagan levelinga at na lubuk, la maklen i do levelinga ren i ruturun.
25Iesu ga lok lempanga vetpes bok i buaang aleng. Do tara na malagan alii na lempanga axap, agut laxanbuk naba umsu aleng la na lavatbung menemen axap noxo epovo rin.
Copyright information for
MMX